Home » games
Category Archives: games
Codognetreviso rules
ALL MY BEST POST AND ATTENTION WILL BE CONCENTRATED ON PROMOTING THE BLOG OF MY HOMETOWN
HERE IS THE LINK IF YOU CARE FOLLOWING ME (probably not)
Zent de strada- Marcellino Gloria- El pi bel “Barbon” che ò mai conossù
De tute le foto che ò vu la fortuna de scatar, quele che me à dat pi sodisfazion no le è certo stade quele dei atori cantanti omeni o femene famosi, capi de stato o papi, ma la Zent che se trova in strada.
A New York, Miami, Conejan, Betlemme, Praga, Codognè, Berlino, Zagabria, Santa Fe' Los Angeles, o a Zimeta me à sempre attirà le facce e i visi segnadi della Zent de strada…. Visi che te conta na storia solche a vardarli….
Al pì dele volte i è "barboni" (li ciamen cussì, ma a volte i veri barboni sen noialtri) che i à sti oci che te varda e i voria contarte la so vita, ma sembra che no sie massa bastanza temp par scoltalrli.
Al pi bel de tuti i volti de strada che ò fotografà, le statt Marcellino, Marcellino Gloria; eccolo qua' fotografà pena fora de la stazion dei treni a Venezia.
Quando che ò comincià a far al reporter, andee ogni dì a Venezia in te un studio fotografico vizin a Piazza San Marco (fotoattualità). L'era un studio che el fea le foto par al gazetin, e mi me interessea imparar le varie tecniche de sviluppo e stampa e "taglio giornalistico" de le foto.
Ho ciapà al treno tutti i dì, par un anno. Marcellino l'era sempre là, in tea prima panchina a sinistra, vegnendo zo' da le scale dea stazion.
Nol domandea mai ne schei ne altro, ma se vedea chel vea bisogno de tutt…
Un dì.. me son fermà e ghe ò domandà se ghe servia qualcossa, lu al me à dita che l'era a posto e dopo qualche minuto al à tacà a contarme la so storia….
No la divide quà, parchè, anca se Marcellino adess l'è in Paradiso, me despiasaria metter la so storia in pubblico.. Quel che importa l'è che lu, nonostante la dificoltà de viver su na strada, l'à sempre conservà na dignità che se ghe la leze sui oci…
Dovunque tu sia in questo momento Marcellino Gloria…. Un saluto ed un abbraccio.
Un po’ de saggezza dei Indiani d’America
–
This we know: All things are connected
like the blood that unites us.
We did not weave the web of life,
We are merely a strand in it.
Whatever we do to the web, we do to ourselves.
-Chief Seattle
Traduzione:
Questo sappiamo. Tutte le cose sono connesse
Come il sangue che ci unisce.
Non abbiamo tessuto la tela della vita.
Ne siamo appena un filo.
Qualsiasi cosa facciamo alla tela
Lo facciamo a noi stessi.
(Capo Indiano Seattle)
La filosofia e la Spiritualità dei Indiani (Americani), lè tutta che la se svolge attorno a stò semplice concetto: Sen tutti connessi l'un co quel altro.
No se pol pensar che na roba che succede in Australia o a New York…In Africa o a Berlino, no ne interesse parchè l'è lontan…
Al mondo l'è come un balon…. se mi ghe dae un calcio da na parte, anca tutta que l'altra la sentirà al colpo.
Questo l'è probabilmente un dei errori che fen pi spess al di' de incuò: Pensar de esser desligadi da tutt quel che succede.
Il Prode Mario Prode Collezionista D.O.C. di dischi dal 1969
Se un personaggio verace l'è restà a Codognè questo l'è Mario Carnelos detto Mario Prode.
Chi elo che nol conosse sto ragazzon co la barba e coi cavei longhi che l'à sempre el sorriso stampà in faccia e che l'è famoso sopratut par na roba: I SO DISCHI.
Mario l'à incomincià a far la collezion de dischi in tel 1969 e no l'à pi smess.
Te pol andar a domandarghe qualsiasi titolo,qualsiasi autor, italian o straniero che lu, te pol star sicuro el te lo trova fora…in tute le verision posibili imaginabili… vinile, cd, assetta eccetera.
Ogni so sforzo in tel tempo libero lo à concentrà a far na raccolta de dischi che scommetto che saria
fadiga trovarghene naltra compagna in tutta italia.Tanti ani fa ghe vessi fat anca un articol sul gazetin…. Me ricorde che andando a farghe le foto a casa sua, al vea dischi in cusina, in camera, soto el let e anca in bagno, parchè dove che el vive no l'à tant posto da meter tutti i so dischi.
Al de là de la collezion Mario l'è veramente na persona disponibile, mi al conosse da quaranta passa anie deve dir che lè veramente difizil trovar na persona cussì solare e disponibile al di de incuò.
Ieri son passà par casa soa e l'ho vist la sentà che el magnea "pomi de San Piero" sentà in tel scalin
davanti casa. Me son fermà e ghe ò domandà se podee farghe do foto e lu naturalmente al me à dita de si….
"posse meterte sul me blog Mario? " Ghe ò domandà… "Ah meteme pur …nessun problema".
Alora ghe ò dita che stasera l'avaria mess in tel blog in dialetto, e ecome quà a mantegner la
promessa. De sti temp bisogna star atenti a tut… a quel che se scrive e a quel che se fa.. L'è sempre qualcun
massa sensibile, anca se te parla ben de lori, no i à caro che te fae massa publicità.
Questo comunque no l'è el caso del "PRODE MARIO" che colgo l'occasion par mandarghe un abbraccio
affetuoso e dirghe GRAZIE par la so disponibilità e la so originalità de Personaggio Caratteristico
de Codognè
Codognè dall’aereo
Angelo Montagner
al me à dat un passaggio sul so aereo…queste foto le è state fate in tel 1992 .
Ho vist la villa e tut el paese dall'alto e me à piasest …
La qualità no la è dele migliori parchè l'era al viero de plastica che me mandea un riflesso fastidioso in tea machina fotografica
Le Suore de clausura de San Giacomo (Omaggio a dele Grandi Persone ..)
Circa venti anni fa, quando che lavoree come reporter, Don Giovanni Dan allora direttor de l'Azione de Vittorio Veneto al me à domandà se volee andar a farghe qualche foto alle suore de clausura de San Giacomo.
Naturalmente ghe ò dita de si ( a chei tempi no disee mai de no se l'era calcossa de novo da veder o da fotografar).
Ho dovù farme far l'autorizazion da l'allora Vescovo de Vitorio Mos. Ravignani e dopo son andà dentro al convento.
El posto al me à piasest suito. L'era na pace, un silenzio, un bel verde. La parea l'anticamera del Paradiso, se stea proprio ben.
Col permesso dea Madre Badessa , dopo verme presentà, ho fatt tante foto e Don Giovanni al me le à publicade suito.
Da chea volta no le ho mai fatte veder pi a nessun… Prima par un senso de rispetto che ghe dovee a queste Sante Persone che l'è le suore de clausura. Ho sempre ammirà come che le posse dedicarse tutta na vita a pregar stando dentro in tel stesso posto, veramente GRANDI PERSONE.
Secondo parchè no volee dar in "pasto" ai giornai dele foto che varia in qualche maniera esposto la fragilità e la sensibilità de le suore.
Adess che ho fatt al blog in Veneto ò pensà de farghe un omaggio a ste Grandi Persone e vist che l'è passà tanti tanti ani, son sicuro de no farghe un dispiazer o de offender nessuna de le sorelle che era presenti quea lontana primavera che ò vù la fortuna de fotografarle.
Le pubbliche in punta dei piè…con grande …immenso senso de rispetto.
Son veramente restà sorpreso quando che ò vist che le vea la so staleta co do tre vache e che una dele suore l'era la col forcon che la metea a posto el stran…
E le lavea la so roba come na volta le nostre none le lavea in tel lavador…
Dopo le e andate tutte a pregar in tel coro, e l'era anca do novizie….che ancora no le vea ciapà i voti..
La Cantina Sociale compie cinquant’anni
Il discorso di Luca su utube: http://www.youtube.com/watch?v=hE_M06SZoys
Aria Fresca
L'era pena passa el temporal e son andà a farme un giro paa campagna co la me bici….L'era un sol che
spachea le piere, e le nuvole le corea in tel cielo azzurro .
Respirando te sentia na aria cussì fresca e neta che la parea pena vegnuda zo da la montagna…
Che bea… sta aria nova e fresca che se respira dopo al temporal senza andar tant lontan….in tea
nostra campagna trevisana
Zent de Codognè….
Una de le persone che me ricorde co tant piazer l'è Gino Lot.
Un Scarper co la S maiuscola de quei de na volta che ormai i à butà via el stamp….
Gino l'era anca un de i pi bravi pescadori de Codognè e quando che lu al 'ndea a pescar nol tornea mai a man vode.
Un dì, come tante altre volte son ndat dentro al so boteghin in via aldo moro, e ghe ho fatt ste foto che vedè qua'.
Gino Lot… una brava persona de Codognè.
Naltra persona ala quale ere veramente affezionà l'era la Beppa Tonelo. L'era na veceta simpatica che la stea in te che la casa vecia che i à butà zo prima de rivar dal municipio sula destra, dopo passa' el negozio de barbier de Adelfio.
La Beppa la vegnea ogni tant a trovarne a casa e la ne contea la storia del "Barba Zucon" che a noialtri boce la ne piasea tant parchè la ne fea paura ma dopo la ndea a finir ben.
Prima che la andesse in paradiso ho avu' la fortuna de poderghe scatar qualche foto…eccole quà le divide co chi che à la bontà e el temp de vegnerme a lezer de tant in tant…
Benedeto inveze l'era un "ragazzo del 99" Co na memoria de fero….al se ricordea tutte le fasi de le battaglie che el vea fatt sul piave e i ultimi ani de la so vita al ndea sempre (al di del so compleano) a butar un mazz de fiori sula Piave par ricordar i so amighi.
L'ho conossu' quande che el vegnea da me papà a darghe na man co un vecio torcio..lu e anca al Bocio Zaia a far al vin bon…
Qua soto inveze l'è un grupo de residenti del "Bar de Spin" in tel palu' a fianco del capitel de la Madona.
Na volta me ricorde i fea na bea sagra del Palu, co l'albero dea cucagna… Sarie bel tornar a ripristinar
i veci modi le vecie abitudini e magari anca le sagre che le fea star insieme la zent…
E par concluder sto post…na bea RIDESTA….. Me zio Gino Dal Cin… Me zio don Valentino Dal Cin e
me papà Narciso Dal Cin che al me à trasmess al "virus" dea fotografia assieme a me mama Teresa.
I Comuni pi sicuri
Na volta i Comuni in Italia i era dei picoli staterelli e i se gestia la vita da soli in maniera autonoma…i vea i so muri e par entrar bisognea passar na porta e farse riconosser…
Adess mi no vui dir che se dovaria tornar indrio cussi de tanti ani (parlen del Medioevo) ma se se podesse tirar indrio le lancette del temp, mi le portarie indrio de almanco na zinquantina de ani se no de zento.
Co se era picoli (mi ho zinquanta do ani adess) me ricorde che se assea verta la porta tuta la not e no se sentia mai dir che i fusse andadi a robar. I unici episodi de furtarelli i era causadi da qualche zinghen de pasajo quando magari che se fermea le giostre in paese.
Le robe purtroppo le è cambiade, ma questo no vol assolutamente dir gnent… Se se à i strumenti par migliorar la sicurezza bisogna usarli e applicarli in tel territorio comunal e magari fazendo ordinanze che le vae ben par tut al territorio dove che i sindaci i à una idea comune come in tel caso de ste ultime elezion che le à decretà na svolta a centro destra sia a livel europeo che a livel local.
La svolta verso destra la à sicuramente un segnal forte e deciso da parte de la zent: qualcossa bisogna far par tornar meter le robe come che le iera. Volen sentirse sicuri a casa nostra e volen che chi che vien a "trovarne" i vegne solche se i a voia de far ben e no a far malegrazie!
MI so ben cossa che vol dir esser emigrante in quanto ho vissù par tanti ani all'estero. Anca mi son stat clandestin par pi de tre ani prima che podesse meterme in regola e star tranqauilllo che no i me buttesse fora…
L'è na bruta sensazion, anca parchè te toca ciapar quei lavori che che altri no vol pi far..
Però me ricorde ben de na roba: Bisognea star atenti a no far i mone, e a no alzar massa la cresta parchè se te fea na qualsiasi malegrazia, i te ciapea su e i te mandea a casa.
In tel me caso parle de la America.. Però la prima roba che i me à domandà co son rivà, l'è stat le impronte digitali..
LE IMPRONTE COME SEGNO DI RICONOSCIMENTO
Allora, parchè no poden far anca noialtri un sistema de riconoscimento comunal, provincial , e regional dove che se un al vol al permesso de lavorar o de soggiornar in tel nostro amato comune, provincia o region, almanco al ne asse na garanzia che no l'è un delinquente già schedà in tel so paese de origine?
Volen andar avanti a far la figura dei mone?
Va ben aiutar chi che vol lavorar e trovarse na vita migliore par lori e la so fameia, ma podene almanco domandarghe in cambio chi che i è veramente e no come che fa i Cinesi che sfruttando l'omonimia e la somiglianza che i à un co che altro i vien dentro a scaretade usando al stesso documento par diese persone?
MAGARI ANCA AL DNA SE EL SERVISSE A TEGNER LONTANI I CRIMINALI..
Ho lett na sera su internet, che in inghiltera i a ciapà un assassin che el vea copà do tose e dopo l'era riussì a farla franca.
Par ciaparlo, i à usà la banca dati che i vea accumulà i te i ani col DNA e un dì, sto assasin, l'à fatt a pugni i te na discoteca (EL LUPO PERDE EL PEL MA NO EL VIZIO)
e i lo a ciapà confrontando el profilo del DNA.
Razzismo ? I me cojoni!!! Scuseme l'espression.
Ma parchè la sinistra tirea sempre fora sta storia del razzimo quando che cerchen de usar i mezzi che ne mette a disposizion la tecnologia?
Vorie veder mi col senno de poi se quele bestie che l'è à copà i do pensionadi a Gorgo se i fosse stadi schedadi, forse se varia podu' fermarli prima…
DENSE NA SVEJADA PRIMA CHE SIA MASSA TARDI.
Alora cossa spetene? Che ne toche metter inferiade e telecamere anca in tel gabineto parchè no sen pi sicuri gnanca a casa nostra?
Comincien dale impronte in tea nostra Region, Provincia, Comun e vedarè che le robe dopo le andarà mejo…
Se a quei dea sinistra no ghe va ben…pasienza, i pol sempre ndar a viver in Cina, o a Cuba, o chei do tre paesi dove che l'è restà el comunismo e no me par che I SIE MASSA CONTENTI..
RITAGLIAMOCI UN PAESE UNA PROVINCIA E UNA REGIONE PIU' SICURE
Eco l'ho scritt in Italian però al senso l'è sempre al stesso…demose na mossa e cerchen de difenderse da chi che vien quà sol par far del mal….quei altri, quei che a bona volontà e i sa star al so posto, no li manda via nessun
Na picola frazion..co un cuor grando come na Montagna
Parlando co na amiga al telefono stasera, ghe ho dita che in te la me vita ghe no vist de tuti i colori: storie bele,brute,alte e basse, come in tele montagne russe dea vita.
Me ritegne un che no se emoziona fazilmente, no parchè mi sia mejo de qualcun altro, solche che co te ghe na vist de tuti i colori te fa pi fadiga, bisogna che sie calcossa de novo o de talmente grando….
Epure….epure quando che o vist i boce de l'asilo de Zimeta far la recita stasera, giuro che ere content de ver la telecamera che me scondea i oci parchè me son veramente emozionà.
Co le so canzon, le so poesie, i so vestitin fati far aposta dale maestre, i à fatt veramente un figuron!!
L' Asilo co la "A" maiuscola che nonostante le dificoltà passade e presenti al riesse ogni ano a sfornar emozion e robe nove, e al merito al ghe va sopratut a chi che ghe à credest de pi : LA ZENT DE ZIMETA.
Partendo da chea Santa Persona de Don Angelo (de nome e de fato). Un vero Pastor che co la so semplicità e la so maniera docile e tranquilla l'à conquistà tuti, ma proprio tuti. Lo so che no ghe piase che se scrive de lu, ma l'è massa bravo a tegner insieme tuta la comunità e mi no posse far de manco de portarghe un immenso rispeto e amirazion par quel che l'à fatt e che el continua a far ogni dì par i so parochiani.
Dopo l'è tuta na miriade de ZENT che ghe vorià un mese par menzionarli tuti. Mame,maestre papà, zie, none,noni,veci zoveni, manco zoveni. Un esercito de volontari in prima linea par afrontar qualsiasi problema insieme, come una comunità ligada e solidale, cole so diferenze ma sempre unida par al ben comune.
El Spirito che ò trovà a Zimeta no lo ò trovà da nessuna altra parte. Al par che el temp al se sia fermà e che le robe le vae avanti cusì da secoli e che le continuerà a andar avanti par sempre co la stessa serenità e voia de far le robe insieme.
Qualche ano fa ò mandà me fia all'asilo e lo so quant ben che i ghe à insegnà tute le robe che ghe servia par afrontar la sfida dea scuola e dea vita.
Ho vu el modo de conosser zent che vee vist solche na volta ogni tant, e co zerti ò fatt anca amicizia.
Quel che me à sempre colpì però l'e statt sempre el Spirito de aggregazion e de voia de iutarse l'un co l'altro attorno a un bravo capelan e sote al stesso campanil.
Se scrive questo, scuseme, ma lo scrive solche parchè Zimeta la me à veramente lassà un segno positivo in te sti ani che l'ò frequentada.
Col dovu' rispeto de chi che no l'è degno de entrar in tea casa de un altro son veramente contento de averve conossù e ò vossù scriver ste do righe par esprimer al me sentimento forte, che l'è stat rinovà stasera quando che drio la me telecamera, filmando un grupo de asilotti me son sentì veramente commosso e fiero de esser in mezo a sta ZENT cussì brava e co un cuor grando come na montagna himalaiana (pio dal cin)
Ve ricordeo Giordano..el Bocio..Fiorello ?
Ogni paese a' el suo "tipo da strada". A volte l'è mat, a volte l'è imbriagon, a volte l'è solche un po s-ciopà, ma a l'è sempre un tipo carateristico che el se distingue da tuti quei altri, a volte distribuendo perle di saggeza, a volte sparando cazzade.
Me ricorde de aver let in tea Bibia che la vera sageza la dimora proprio in questi "elementi" o "schegge impazzite" della società.
L'è anca massa facile rider de lori. Personalmente i ò sempre rispedati.. e fotografadi…parchè ho sempre ritegnu' che sti personagi i abie calcosa de magico e intersante da insegnarne.
Traduzione italiana:
Ogni paese ha il suo "tipo da strada". A volte è pazzo, a volte è un ubriaco, a volte è solamente un po' fuori di testa ma è pur sempre un tipo molto caratteristico che si distingue tra tutti gli altri, a volte distribuendo perle di saggezza, altre sparando cazzate.
Ricordo di aver letto nella Bibbia che la vera saggezza dimora proprio in questi elementi o "schegge impazzite della società".
E' anche troppo facile ridere di loro. Personalmente li ho sempre rispettati, e fotografati con piacere, perchè ho sempre ritenuto che questi personaggi abbiano qualcosa di magico ed interesssante da insegnarci.
English translation:
Every town has its own "street person". Sometime he is just nuts, some others a drunk, others he is just out of his own mind, but he is always a very characteristic type who stands out from everyone, sometime distributing wisdom, others just saying useless words.
I remember reading in the Bible that real wisdom nests in these "elements" or crazy society's outcome.
It is too easy to laugh at them. Personally I have always respected (and photographed them) with pleasure because I have always thought that these people have always something magic within and something interesting to teach us.
